【中環街市走得太前？定係我哋太過依戀舊日？】 中環街市今日開始試業，呢座有八十年歷史嘅三級歷史建築物，經過多年修復活化，終於重新開放。入裡總共有過百間商舖及食肆，當中包括本地小店及品牌。
作為香港第一個現代化嘅街市，中環街市希望成為一個與眾同樂嘅地方 ""Playground for All”。設計方面配合主概念，設有過千平方米嘅綠化休憩空間，比起傳統街市有更多嘅公共空間，冀為社區帶嚟活力。
喺保育同傳承方面，亦將設有展覽廳俾市民了解歷史，回顧街市嘅前世今生。牆壁同有名嘅中央水磨石大樓梯等特色設計得以保留，整體空間規劃亦有一份獨特設計感，令唔少地方變成潛力打卡位。
其實街市經過全面翻新後試業，有人指似商場多過街市，昔日情懷變得商業化，面目全非；同時亦有街坊話告別咗惡劣衛生環境，商舖及空間用途都變得更多元，係社區進步嘅象徵。
無論你覺得今次活化係成功抑或失敗，活化後嘅中環街市的確為香港人嘅生活帶嚟改變，至少俾大眾認識更多本地品牌、文化及空間規劃，絕對稱得上係值得一遊嘅地方。 活化成功與否，未必有標準答案，一直只有喜歡與否，與其道聽途說，不如去親身感受一趟。