本地去處|不只是書店的一拳書館

講到大南街,自然會聯想起「咖啡」同「文青」等關鍵字,但喺大南商業大廈三樓,有個人正喺度一拳一拳打緊落去啲框框度,拳拳到肉,寄望有知覺嘅人可以覺醒,一齊去改變社區同固有思維,擴闊閱讀同生活嘅邊界。呢間就想「一拳驚醒讀書人」嘅一拳書館。




一間書店應該係點?

間唔中有折、系統化嘅書籍分類?店主龐一鳴先生希望借呢度向大家呈現,原來書店唔需要被太大框框所限制,各項細節都有種「一拳驚醒讀書人」嘅感覺,衝擊每個到訪嘅客人。


一拳書館唔似傳統大型書店,呢度地方唔算好大,比起書店其實更似一個平實嘅屋企。可能由於空間所限,店內書籍數量較大型書店少,但店主堅持預留部分空間俾讀者「打書釘」同埋舉辦活動。不過,可能都因為地方細,所以店主喺選書上會更花心思,為讀者提供更多元化嘅閱讀體驗,例如一啲大型書店見唔到、太敏感而被下架、或者其他聞所未聞嘅小眾書籍,都有機會可以喺度搵到。




書籍分類

講完選書,呢度嘅書籍分類方式都十分有趣,有異於一般認知嘅文學、歷史、哲學、商業等分類,反而係用特定主題例如生活情境或者概念,避免因為閱讀偏好及習慣而造成嘅單一化,,令讀者可以接觸到更多預想外嘅書籍,以下為其中一啲特色分類:


「酒吧話題」 - 意指作酒吧傾偈或者係生活話題,涵蓋文史哲類及工具書。

「無用之用」 - 集合被指「冇價值」嘅書籍,主要由係文史哲及藝術書籍組成。

「恩書」- 購買由讀者推薦嘅恩書,一啲曾改變過某人生命嘅書籍。

「絕」- 每本書、每個版本都有絕版嘅可能性,所以集合咗唔同罕有及懷舊書籍。


除咗以上各種命題,其實仲有更多分類或者不時都有小型出版社嘅迷你書展。




買書送菜 - 讓讀者接觸更多本地產品

一拳書館嘅書基本上都唔會有任何折扣,取而代之嘅係會搭棵菜或者其他本地產品。用有機菜、蝦子麵等本地產品代替折扣,目的係為咗尊重返書籍本身同作者,同時想令顧客有多個渠道接觸本地產品,發現更多生活可能性。




比書店更多

劃分咗空間用作閱讀及活動區域,成為書友同街坊停嘅聚腳點,所以不時都會有唔同活動喺度舉行,例如讀書會、分享會、工作坊,甚至,你諗到諗唔到嘅,都有機會喺呢個空間度發生。呢啲活動令閱讀超越閱讀,令整件事更顯立體,甚至可以話係營造緊一個以閱讀為中心嘅社羣。




喺金錢掛帥嘅商業社會,包括書店在內唔同行業都難以脫離大集團式嘅經營,格式化而變得統一。「一拳書館」以信念及堅持改變緊人們對書店嘅固有想法,擴闊緊閱讀及書本邊界,令閱讀變得更自由。


一拳書館

地址:深水埗大南街169至171號大南商業大廈3樓

營業時間:12:00pm-9:00pm

Facebook:www.facebook.com/bookpunch/

IG:www.instagram.com/bookpunch/

3 次查看0 則留言

最新文章

查看全部